Dei generelle opptakskrava til videreutdanningar og deltidsstudium ved UiB er beskrive nedst på denne sida. Opptakskrava er ulike og avhengig av om emnet er på bachelor- eller masternivå og om det er med- eller utan studieavgift.
I tillegg kan ein del vidareutdanningar ha særskilde krav til forkunnskapar frå tidlegare utdanning og/eller arbeidserfaring. Slike særskilde krav er vil stå på nettsida for det aktuelle studiet og skal dessutan vere nedfelt i emnebeskrivelsen/studieplanen for emnet/studiet.
Korleis søker du?
Du søker studieplass via søknadsportalen EVUweb. Dersom studiet du ønsker å ta er ope for søknader og har ledige plassar, vil du finne lenke til søknadsportalen inne på nettsida for det aktuelle studiet.
Du loggar inn i EVUweb med ID-porten/MinID. Har du Feide-brukar frå tidlegare studiar ved UiB kan du også logge inn med denne.
Her registrerer du søknaden din og lastar opp eventuelle vedlegg. Sjå avsnitta om Opptakskrav og krav til eventuell dokumentasjon nedst på denne sida.
Søknadsfristar
Nokre av vidareutdanningane ved UiB har faste søknadsfristar, medan andre har løpande opptak med fleire opptaksrunder fram mot studiestart eller så lenge det er ledige plassar. Kva for søknadsfristar som gjeld finn du på nettsida for det aktuelle studietilbodet.
Svar på søknad
Du får normalt svar på søknaden din nokre få dagar etter søknadsfrist/oppgitt dato for neste søknadsbehandling. Svaret blir sendt til di private e-postadresse, det vil seie den e-postadressa du er oppført med i det sentrale Kontakt og reservasjonsregisteret. Dersom du ønsker å endre e-postadressa di eller oppdatere andre kontaktopplysningar må du sjølv endre dette. UiB har ikkje løyve til å gjere dette for deg.
Tilbod om studieplass på visse vilkår
Dersom du på søknadstidspunktet ikkje tilfredsstiller opptakskrava fullt ut., t.d. at du fullfører bachelorgrad seinare samme semester, kan du få tilbod om studieplass på vilkår. Du vil då kunne få tilbod om studieplass på det vilkåret at du ettersender dokumentasjon innan avtalt frist. Dersom du ikkje gjer dette innan fristen vil UiB kunne trekke tilbake tilbodet om studieplass.
Svarfrist
Når vi sender ut tilbod om studieplass får du ein frist på 7-14 dagar på å svare ja eller nei til tilbodet. Svarfristen kan i nokre tilfelle vere kortare, dersom det er snakk om suppleringsopptak/restplassar eller det er kort tid til studiestart.
Direkte påmelding
Til enkelte av studietilboda våre vil det vere automatisk påmelding i staden for ordinær søknadsbehandling. Det vil seie at du får studieplass med ein gang, i staden for at du må vente på svar. Dette gjeld studietilbod utan særskilte opptakskrav, så lenge vi har ledige plassar.
Vilkår for vidareutdanningsstudentar
Når du har takka ja til studieplass på vidareutdanningsstudier ved UiB gjeld eigne vilkår for mellom anna trekk/angrerett, pause/permisjon, med meir.
Her finn du også meir informasjon om vilkår knytta til betaling av semesteravgift og eventuell studieavgift.
Opptakskrav til vidareutdanningar og deltidsstudium
Vidareutdanningsemner på bachelornivå
Dersom du søker opptak til eit vidareutdanningsemne på bachelornivå gjeld desse opptakskrava:
- Er du under 25 år? Du må ha generell studiekompetanse (GSK).
- Er du over 25 år? Du må som hovudregel ha generell studiekompetanse. Dersom du ikkje har generell studiekompetanse kan du søke om opptak på grunnlag av realkompetanse.
- Dersom du søker opptak til eit emne som har studieavgift, må du også dokumentere at du har minimum to års arbeidserfaring.
Dokumentasjon av generell studiekompetanse
Har du tatt høgare utdanning tidlegare vil du i mange tilfelle vere registrert med generell studiekompetanse og du treng difor ikkje dokumentere dette på nytt. Du ser om du er registrert med generell studiekompetanse når du har logga deg inn i EvuWeb for å søke på eit vidareutdanningstilbod hos oss.
Dersom generell studiekompetanse er det einaste opptakskravet til emnet du søker på og du ser at du allereie er registrert med dette, treng du ikkje legge ved ytterlegare dokumentasjon.
Dersom du ikkje allereie er registert med generell studiekompetanse og er under 25 år, må du legge ved dokumentasjon på at du har dette når du søker om opptak til eit vidareutdanningsemne hos oss. Gyldig dokumentasjon er vitnemål eller kompetansebevis frå vidaregåande skule, yrkesfag med påbygging osv.
Du kan lese meir om ulike vegar til generell studiekompetanse hos Samordna opptak: Universitet og høgskole - opptakskrav og poeng - Samordna opptak
Dokumentasjon av realkompetanse
Dersom du er over 25 år og ikkje har generell studiekompetanse, kan du søke opptak på grunnlag av realkompetanse. For opptak til vidareutdanningsemne på bachelornivå utan andre opptakskrav praktiserer vi ei forenkla realkompetansevurdering. Det vil seie at vi reknar summen av tidlegare utdanning og arbeidserfaring som tilstrekkeleg opptaksgrunnlag for vidareutdanningsemne hos oss. Du treng ikkje sende inn nokon form for dokumentasjon på tidlegare utdanning/arbeidserfaring.
Dokumentasjon av arbeidserfaring
For emne på bachelornivå som har studieavgift er det i tillegg til krav om generell studiekompetanse eller realkompetanse også eit krav at du har minimum to år med arbeidserfaring. Vi krev ikkje dokumentasjon på arbeidserfaringa di, men du må stadfeste ved avkryssing at du har minimum to års arbeidserfaring når du registrerer søknaden din. Har du hatt deltidsstillingar må du rekne om til full tid. Du må til dømes ha jobba fire år dersom du har hatt 50% stilling.
Vi vil ta stikkprøver og dersom du ved forespurnad ikkje kan dokumentere at du har to år med arbeidserfaring vil du kunne miste studieplassen.
Vidareutdanningsemner på masternivå
Dersom du søker opptak til eit vidareutdanningsemne på masternivå må du kunne dokumentere at du fyller følgande opptakskrav:
- bachelorgrad
- cand.mag.-grad
- annan grad eller yrkesutdanning av minimum 3 års omfang
- utdanning som etter § 3-5 i Lov om universitet og høgskular er godkjent som jamngod med gradar eller utdanningsløp nemnt ovanfor
- Du må i tillegg dokumentere at du har minimum to års relevant yrkeserfaring
I spesielle tilfelle kan andre dokumenterte kvalifikasjonar bli vurdert som heilt eller delvis likeverdig med utdanningsløpa ovanfor. UiB kan i slike tilfelle gje unntak for inntil eitt år/60 studiepoeng av utdanningskravet, dersom du også kan dokumentere særskilt lang og relevant yrkeserfaring utover minstekravet på to år. Som hovudregel vil vi då kreve at du kan dokumentere minimum fire års relevant yrkeserfaring.
I nokre tilfelle kan det vere krav til at den tidlegare utdanninga di er innanfor eit relevant fagområde og kravet til tidlegare yrkeserfaring kan også vere meir enn to år. Kva som vert rekna som relevant yrkeserfaring og eventuelt relevant grunnutdanning skal framgå av omtalen av studietilbodet på nettsidene og i emnebeskrivelse/studieplan for studiet.
Dokumentasjon av høgare utdanning
Har du teke høgare utdanning frå UiB eller andre offentlege universitet/høgskular i Norge vil vi i dei fleste tilfelle ha tilgang til å hente fram eksamensresultata dine og du treng difor ikkje legge desse ved søknaden din.
Har du derimot utdanninga di frå ein privat høgskule, frå utlandet eller du avslutta utdanninga di før 1995 må vi be deg laste opp vitnemål/karakterutskrifter som vedlegg til søknaden din. Du finn oversikt over utdanningsinstitusjonar som automatisk deler eksamensresultat når du har logga deg inn for å registrere søknad.
Dokumentasjon av relevant arbeidserfaring
Du må legge ved attest/tenestebevis eller anna stadfesting frå arbeidsgivar som viser at du fyller kravet om minimum to års relevant arbeidserfaring.
Attest/stadfesting frå arbeidsgivar må vere datert og innehalde følgande informasjon:
- Start og evt. sluttdato
- Stillingsprosent
- Stillingstittel
- Signatur frå arbeidsgivar (e-signatur er godkjent)
Merk at CV og arbeidsavtale åleine ikkje er godkjent dokumentasjon på arbeidserfaring.
Ved utrekning av ansiennitet blir deltidsstillingar rekna om til mnd./år i fulltid.
Eventuelle særskilde opptakskrav
I tillegg til dei generelle opptakskrava omtalt ovanfor kan det vere knytta særlege opptakskrav til vidareutdanningsemner, både på bachelor- og masternivå. Dette kan t.d. vere krav om bestemte faglege forkunnskapar i tillegg til generell studiekompetanse, t.d. at du må ha matematikk/realfag i fagkrinsen for opptak til visse realfaglege vidareutdanningsemne.
Det kan også vere krav om at du har ein bestemt utdannings- eller yrkesbakgrunn. Til dømes gjeld dette mange av vidareutdanningane for lærarar, der det er eit tilleggskrav at den som søker må ha godkjent lærarutdanning.
Slike særskilte opptakskrav skal framgå av omtalen av studietilbodet på nettsidene og i emnebeskrivelse/studieplan for studiet.
Rangering av søkarar
Vi har eit visst antal studieplassar på kvart vidareutdanningsemne. Hovudregelen er at vi tek opp kvalifiserte søkarar etter førstemann til mølla-prinsippet, det vil seie i den rekkefølga søknadane er registrert i vårt søknadssystem, så lenge vi har ledige plassar. Blir det fullt, vil du kunne få tilbod om å stå på venteliste.
For ein del vidareutdanningstilbod er det fastsett kriterier for prioritering blant søkarane. For nokre av tilboda er det også avsett kvoter for samarbeidspartnarar/oppdragsgivarar. Karakterar frå tidlegare utdanning etc. vil berre unntaksvis vere eit prioriteringskriterium.
Kva for prioriterings- og rangeringskriterier som gjeld for det enkelte studium vil framgå av omtale på nettsider og eventuelt også i emnebeskrivelse/studieplan. Om ikkje anna er oppgitt, gjeld førstemann til mølla-prinsippet.